SIBU, 29 April: Raban nembiak lebih agi sida ke beumur 18 taun nyentuk ke 28 taun endang diperansang ngaul diri ba program randau ti diatur Sarawak Volunteers.
Kaban Kunsil Nengeri (ADUN) Nangka, Dr Annuar Rapa’ee madahka, pekara tu chukup beguna laban raban nembiak rebak baru ti nyadi tuai raban bansa enggau tuai perintah dudi hari sereta neruska pemansang nengeri.
Beduduk ari nya, Parti Pesaka Bumiputera Bersatu (PBB) setuju deka numbuhka PBB 1828.
“Kitai deka numbuhka serakup tauka entiti ba dalam parti ti nyadi sebagi ari tangkup pengawa ngaul raban nembiak di nengeri tu ke ukai semina mekuhka pemansang ba dalam politik aja, tang mega nyengkaum pekara pemansang,” ku iya madah rambau bejaku ba dalam Program Sungkey Begulai enggau nembiak IPTA enggau IPTS lebuh Hari Lima.
Iya madahka nengah program randau baka nya raban nembiak ulih belematika senentang aspirasyen nyadi tuai ba siti-siti bidang seraya beratika isu tauka pemar ke ditapi sida kemaya hari tu.
Dr Annuar ke mega Sapit Menteri Pelajar, Inovasyen enggau Pemansang Pengelandik (Pelajar Tinggi enggau Inovasyen) nerangka, raban nya bejalaika pengawa ke beguna nyadi kaban pemansang nengeri lebih agi ngatur program nyadi volunteer.
“Berindik ari nya, PBB 1828 nyadi siti pelantar dikena raban nembiak bejalaika aktiviti ke meri pemaik ngagai komuniti sereta ngemansangka program ti tau meri pemujur ngagai raban nembiak ti ngaul sosio-politik di nengeri tu,” ku Dr Annuar madah agi.
Iya arapka raban nembiak di Institut Pelajar Tinggi (IPT) sekalika ba perintah tauka peribit nguna peluang ke disediaka nya bekunsika perambu sereta penemu sida ke tau meri pemaik ngagai semua.
