KUCHING, 29 April: Penyampau kes baru enggau kes pemati ketegal COVID-19 di Sarawak majak kurang ba dalam timpuh menua ngalih ke renggat endemik kenyau ari 1 April 2022.
Direktor Opis Pengerai Sarawak Dr Ooi Choo Huck madahka, bisi 6,839 kes baru ti dirikodka kena 1 nyentuk 28 April ti dibanding 38,529 kes ba bulan siti nyin kemari.
“Kes pemati, bisi 41 kes dirikodka kena 1 nyentuk 28 April, ti dibanding 61 kes kena bulan Mac ke udah,” ku iya madah nengah siti penerang lebuh Hari Lima.
Berebak ari nya, Dr Ooi nerangka, senentang katil ukai Unit Rawatan Rapi (ICU), semina diguna ba taka 26 peratus seraya katil ICU ke diguna ngerikodka taka 10 peratus ba Minggu Epid ke-16 iya nya 17 nyentuk 23 April, ti dibanding 40 peratus enggau 36 peratus ba Minggu Epid ke-13 (27 Mac nyentuk 2 April 2022).
“Statistik tu ngayanka gaya kes baru enggau kes pemati bisi kurang enggau kapasiti sepital ba tikas ke manah.
“Pekara tu mega mandangka gaya pandemik COVID-19 di Sarawak majak kurang sereta nyau majak pulai manah,” ku iya madah.
Dr Ooi madahka, pemujur nya ulih dijapai asil ari pengawa nagang enggau nyaga pengerai mensia mayuh ti nyengkaum program betuchuk vaksin COVID-19 di Sarawak ke alai naka 26 April, pemayuh orang ke udah nerima vaksin di serata nengeri tu manggai 80.6 peratus.
“Peratus pemayuh raban besai tuai ke udah nerima dos kedua iya nya 91 peratus enggau raban nembiak penyampau 93.1 peratus,” ku iya madah agi.
Nangkan ke nya, pemayuh raban nembiak mit ke beumur lima nyentuk 11 taun ke udah nerima satu dos vaksin di nengeri tu udah manggai 79.7 peratus.
