KUCHING, 28 April : Semua rayat dipinta seruran bejejaga taja standard atur pengawa (SOP) ditenduka.
Pia ku chairman Komiti Penyangga Penusah Ngenyit (JPBNS), Datuk Amar Douglas Uggah Embas.
Ku uggah madah, penyampau kes enda dipadahka agi baka ke dipadahka ninting hari berengkah 1 hari bulan Mei 2022.
“Kitai sehari tu mega mutuska kitai enda agi madahka kes-kes ninting hari baka ke digaga ngelamatu. Kitai nitihka singkang ke udah digaga KKM”, ku iya.
Taja pia ku iya, iya ngelalau mensia mayuh ngambika seruran bejejaga laban covid-19 endang agi bisi idup enggau kitai taja kes ninting hari dipeda majak nurun.
Nangkan ke nya Uggah madahka orang ke deka tama ke nengeri tu sekalika ari menua luar enda ibuh agi bejalaika peresa nguna RT-PCR 2 hari sebedau tama ke menua tu baka ke diterit atur sebedau tu.
Kelimpah ari nya, Uggah madahka nengeri Sarawak udah besedia nerima pekara tu laban taka orang ke udah nerima tuchuk vaksin di nengeri tu tinggi, iya nya penyampau 92 peratus lalu kes mega dipeda majak nurun.
Nangkan ke nya Uggah ke mega Sapit Premier Sarawak madahka diatu kereban dikena beperesa covid-19 udah mayuh dijual.
“Diatu muntang deka ngulihka kereban dikena beperesa laban kitai ulih ngena kereban dikena beperesa ke lebih murah lalu diatu udah mayuh dijual. Kitai mega bisi ubat ‘antiviral’ di Sarawak, enti begunaka nya”, ku iya lebuh ditelefon pengarang berita TVS.
Kelimpah ari nya semua sukut ekonomi mega deka berengkah dibuka kena 15 hari bulan 5 2022.
Sebedau tu Menteri Pengerai Khairy Jamaluddin dalam siti aum media madahka entara SOP ke baru ke deka diterit atur iya nya tau enda ibuh nguna sengkabung mua tang tu bepanggai ba siku-siku orang enti diau di luar begunan enggau kandang endur tebuka.
Taja pia mensia mayuh diperansang ngena sengkabung mua enti ba endur ke sekut tauka mayuh orang.
