BINTULU, 24 April:Perintah ti tegap ketegal ari pemanah kaul penyerakup pupu bansa, pia ku Sapit Presiden Parti Pesaka Bumiputera Bersatu (PBB) Sarawak, Datuk Amar Douglas Uggah Embas.
Berindik ari nya, mensia mayuh dilalau ngetanka penyerakup enggau chara begempung ngambika perintah meruan tegap.
Ku uggah madah, raban parti PBB patut nyikap diri napi pemar dudi hari ila lebih agi enggau pemansang arus teknologi kemaya hari tu.
Tu laban, bisi sekeda ti nguna pemaik pelantar teknologi enggau chara ti salah bejakuka pengari rayat enggau perintah.
Taja pan pia, ku iya, PBB nyentuk ke diatu agi kering lalu majak mansang ketegal ari pemanah basa raban dalam parti PBB ke udah ditumbuhka kenyau ari taun 1974.
“Kitai mesti ngetanka penyerakup ngambika perintah seruran tegap,”ku iya rambau bejadika aum tiga taun sekali pampang Bintulu lebuh Hari Enam.
Nya kebuah, beguna bendar raban parti seruran begempung enggau pangan diri.
Iya minta semua raban parti meri sukung penuh ngagai komponen bukai dalam Gabungan Parti Sarawak (GPS) ngambika ulih ngerebut baru kerusi sitak Selangau.
