BINTULU, 23 April: Kompeni ti bejalaika pengawa berumah enggau infrastrakcha di nengeri tu dilalau ngambi pekereja peranak menua tu gawa sereta nyikap sida enggau pengelandik baru ti nyerangkung orang ke pakar ba dalam siti-siti bidang.
Sapit Premier Sarawak, Datuk Amar Douglas Uggah Embas madahka, nengah chara tu penanggul kurang pekereja ke suah ditapi kompeni ulih diputarka.
“Enti sema kompeni napi isu kurang pekereja, pekara tu ulih ngasuh projek ke digaga laun tembu nitihka timpuh ke udah ditetapka.
“Projek tu dijangka tembu kena 28 September 2023,” iya mansutka jaku nya lebuh ditanya sepengudah ngulu licha bekaul projek ngaga Jematan Bintulu-Jepak ti ngelayang Kuala Kemena ke beungkus RM467 juta di opis kunteriktor lebuh Hari Enam.
Uggah ke mega Menteri Infrastrakcha enggau Pemansang Penyangkai Kapal nerangka, projek nya digaga nengah kerejasama entara PPES Works (Sarawak) Sdn Bhd enggau kompeni ari China iya nya China Communications Construction Company(M) Sdn. Bhd.
Ku iya madah, nengah pengawa baka nya Sarawak ulih nambahka penyampau pekereja ti landik ba dalam siti-siti bidang dikena nyaup ngemansangka nengeri.
“Nengah chara tu kitai ulih ngurangka nengeri kelalu bepanggai ba pekereja peranak menua luar,” ku iya madah agi.
Ba pengerembai ke sama, Uggah minta opis tauka ejensi ke bekaul ngelengkaska pemendar visa ungkup pekereja tauka pakar peranak menua luar ke diguna rambau bejalaika projek pemansang di Sarawak.
Tuju nya dikena nentuka tetiap projek infrastrakcha besai ke digaga bejalai lanchar sereta ulih tembu nitihka timpuh ke udah ditetapka. – TVS
