SARIKEI, 22 April: Bulan puasa ukai semina ngaul peranak ti bepengarap Islam, tang mega nerima sambut ke manah ari peranak ukai Islam di nengeri tu.
Pekara tu ulih dipeda nengah pengerami buka puasa ke diatur bisi digulu sida ke ukai bepengarap Islam ke datai ari rayat pupu bansa.
Sapit Menteri di Opis Premier Sarawak (Integriti & Ombudsman), Datuk Dr Juanda Jaya madahka, tu mandangka penyerakup rayat Sarawak seruran tegap ari suba nyentuk ke diatu sereta ulih dijadika teladan nengeri bukai.
“Enti kitai meda, ukai semina orang ke puasa aja ngelawa enggau bebelika pemakai di Bazar Ramadan. Orang ke ukai bepengarap Islam pan gagit ati sereta sama ngerichahka bazar nya ninting hari.
“Bazar Ramadan di Kuching, Sibu enti enda salah aku jalai alun nyau sekut. Tu meh entara pemanah ti dikembuan kitai lebuh menua likun. Pengelikun enggau pengelantang tu meh mesti dijaga enggau ditanka kitai semua,” ku iya madah rambau bejadika Program Jelajah Integriti Siri 3/2022 Bagi Menua Sarikei di Masjid Ar-Rahmah Kampung Seberang Sarikei lebuh Hari Empat.
Dr Juanda ke mega Kaban Kunsil Nengeri (ADUN) Jemoreng mega nerangka, senentang siku-siku orang mesti bisi integriti rambau bejalaika pengawa ninting hari.
Sekalika lebuh besembiang tauka gawa, integriti mesti dikemeratka laban pekara nya ulih nempa pekereja ti bisi kualiti sereta ulih nyapai penyulut ba pengawa ke dikereja.
Nangkan ke nya, iya arapka mensia mayuh sekalika orang ke bepengarap Islam enggau pengarap bukai bulih berekat sereta pemujur sepemanjai bulan Ramadan tu, sereta ngelalau sida ke nyambut Hari Raya seruran bejejaga laban menua diatu agi dituntung pandemik COVID-19. – TVS
