KUCHING, 22 April: Ba pun ari pengerindu nero kenyau ari mit enggau angkunka keresa lama ngujungka Helena David Kulum, berani ngambi singkang ngaul diri ba dunya pengawa dagang ti berengkah ba taun 2015.
Pengempu Helena Craf Borneo tu ngasilka produk ari seramik ti nguna motif Borneo diatu udah majak ngerembai lalu udah rembus ngagai makit antarabansa.
Helena ke asal ari Ulu Layar Betong madahka, dulu suba iya semina begagaka produk ari seramik baka manik, gelang enggau antin sebedau ngasilka pinggai seramik ngena motif budaya Iban.
Ngelansa jalai pengidup keterubah ba dunya dagang, ku iya madah, runding deka ngaga produk pinggai seramik tu ketegal ari inspirasyen koleksi pinggai seramik ratusan taun ke dikembuan iya.
“Buah runding tu datai ari aku empu, aku bisi pinggai lama di rumah. Ari nya aku nguji ngelatih jari aku nero maya Atur Nagang Pemindah (PKP), pengudah nero lalu ngaga tanah nya nyadi pinggai,” ku iya lebuh dirandau pengarang berita TVS empai lama.
Ku iya nambah, berindik ari PKP dua taun ke udah ketegal pandemik Covid-19 meri peransang ngagai Helena ngaga ukir motif baka motif ngena ngepan, rumah panjai enggau motif pua kumbu.
“Taun nyin suba aku mikir, enda ulih mindah ke luar, aku nguji ngaga pinggai,”ku iya.
Iya nerang, timpuh ngasilka sesebengkah chura ba pinggai bebida laban nya bepanggai ba bansa chura ke digaga.
Pengeransing ngangkatka produk motif Iban tu meri pemujur ngagai Helena pengudah dipilih Perbadanan Kemajuan Kraftangan Malaysia ungkup ‘Program Perantisan’.
Berebak enggau nya, iya ngarap deka mayuh agi rebak biak ngaul diri ba pengawa dagang asil pengelandik jari seraya ngangkatka pemanah motif Sarawak ngagai menua luar.
Helena diatu benung dalam perambu deka ngasilka siti agi produk seramik ke baru ti dikumbai ‘Tajau’.
