KUCHING, 22 April : Ketegal sayauka parti, kami berunding lalu berandau baka ni chara mutarka pekara tu.
Pekara tu dipadahka mandal presiden Parti Rakyat Sarawak (PRS) Datuk John Sikie Tayai.
Pemutus tu digaga asil ari pengawa berunding enggau komiti tinggi ungkup pemaik dalam parti nya.
Berindik ari Aum Deligit Tiga Taun Sekali (TDC) ke patut diatur, opis pengerejista gerempung menua minta parti tu ngatur aum TDC ba hari bulan ke udah ditetapka tang ketegal bisi penanggul, TDC tu dilanjarka ngagai bulan Mei.
Ku John Sikie madah, pengawa bepilih dikena nentuka sapa ke patut dichiri nyadi presiden iya nya singkang tauka chara ti kepenudi ungkup parti.
Ketegal sayauka parti PRS ti udah ditumbuhka kenyau taun 2004 , John Sikie ke mega Kaban Kunsil Nengeri (ADUN) Kakus madahka atur ti bejurai siti-siti pekara enggau pangan diri nya chara pemadu badas dikena nyaga penyerakup dalam parti.
“Nyema kami tu belaban, ngatur pengawa bepilih.. pangku pengawa presiden nyentukka pangku pengawa ke bukai deka dipilih baru, enti nyema bisi orang enda puas ati bisi ngeripot ngagai ROS, utai ti deka nyadika penanggul iya nya nangika parti tu dikinsil dalam ROS”,
Nangkan ke nya, iya madahka dikena ngenegapka kaul dalam parti kerejasama patut dikemeranka.
“laban aku sayau amat ke parti laban aku siku ari orang ke numbuhka parti PRS suba enggau niang Tan Sri Dr James Jemut Masing taun 2004.. nya alai aku sayau amat ke parti tu. Lebuh kami ke berunding tu tadi, kami bela betemu lalu mutuska pekara tu tadi, ngambika utai tu enda charut. Kedua laban mesti bekerejasama. Awak utai tu enda nyadika penyarut,” ku iya lebuh ditelefon pengarang berita TVS pagi tadi.
Ku iya madah agi, bisi kaban politik ngelalau iya ti madahka enti nyema parti tu bepechah pekara tu tau ngeruga Gabungan Parti Sarawak (GPS) ba pengawa bepilih besai ti deka datai lalu pekara tu patut diberi perati.
Parti Rakyat Sarawak (PRS) sebuah parti dayak ti ditumbuhka kenyau taun 2004, dituaika niang Tan Sri Dr James Jemut Masing berindik ari penanggul dalam Parti Bansa Dayak Sarawak (PBDS) ngujungka parti tu dikinsil dalam register (ROS) .
Nya alai Datuk John Sikie enggai sejarah tu nyadi ba parti PRS, ti ngujungka iya ngalahka diri ari ti bediri ngerebut penuduk dalam parti laban deka nyaga pemaik dalam parti.
Ke lansa, Mandal Presiden PRS Datuk John Sikie Tayai ke mega Menteri ba Opis Premier Sarawak sebedau tu madahka diri deka betanding megai pangku pengawa nyadi presiden Parti Rakyat Sarawak (PRS).
