KUCHING, 21 April: Yang Di-Pertuan Agong Al-Sultan Abdullah Ri’Ayatuddin Al-Mustafa Billah Shah enggau Raja Permaisuri Agong Tunku Azizah Aminah Maimunah Iskandariah datai ke Kuching nemuai seraya kereja pengelama dua hari ke nengeri tu.
Penatai seduai diambat Tuai Megai Menua (Tyt) Nengeri Sarawak, Tun Pehin Sri Taib Mahmud enggau Premier Sarawak, Datuk Patinggi Tan Sri Abang Johari Tun Openg ba Padang Bilun Entarabansa Kuching ditu, kena Hari Empat.
Bela datai nyambut agong iya nya Speaker Dewan Kunsil Nengeri Sarawak Tan Sri Mohamad Asfia Awang Nassar, ketiga-tiga sapit premier iya nya Datuk Amar Douglas Uggah Embas, Datuk Amar Awang Tengah Ali Hasan Enggau Datuk Seri Dr Sim Kui Hian sereta rintai kabinet negeri.
Ba keterubah pejalai, agong ngelawa bisi bazar ramadan Satok kilah lemai tadi.
Seduai Seri Paduka pengudah tu dilanggur ngulu pengerami buka puasa enggau Makai Lemai di Masjid Jamek Nengeri.
Ba pengerami nya seduai deka nyuaka bantu pemeri ngagai 30 iku penerima .
