SRI AMAN, 21 April: Pengerami ti dianti mensia mayuh iya nya Pesta Benak 2022 deka diatur baru berengkah 9 nyentuk 11 September tu .
Pengerami tu udah ditetapka ba dalam aum Komiti Pesta Benak 2022 begulai enggau Chairman Komiti Induk Pesta Benak 2022, Datu Indit Bangai ti bechairmanka Menteri Muda, Pelajar, Inovasyen enggau Pemansang Pengelandik, Datuk Francis Harden Hollis di bilik aum Residen Bagi Menua Sri Aman, kemari.
Iya ke mega Kaban Kunsil Nengeri (ADUN) Simanggang madah, pengawa ngatur pesta benak tu digaga pengudah ngira menua ngalih ngagai renggat endemik enggau sektor ekonomi pan dibuka penuh.
Ku madah, dijangka deka mayuh temuai ari dalam enggau menua luar dijangka datai ngulu pengerami tu meda pengerichah aktiviti tradisi ke bisi lebih agi Pekit Regatta (Lumba Perau).
Tambah mega, palan endur pengerami sekali tu disikap enggau taba baru ke chukup manah pengudah Projek Waterfront Sri Aman tembu digaga.
“Komponen projek iya nya Wharf Section (Tapak Pesta Benak), Board walk enggau Culture Heritage Centre ti ngengkahka 14 lot kedai. Kitai bisi pengarap bendar nyema palan nya engkeman deka diatur pengerami bejadi Sri Aman Waterfront ari Premier Sarawak,” ku iya dalam siti penerang.
Mayuh macham aktiviti deka diatur dikena matak temuai baka pengawa pemandang pemansang, pengawa pemandang institusyen pelajar, bazar ria enggau panggau pemerindang.
Kelimpah ari nya, Pekit Ratu Benak enggau Ratu Kebaya Nyonya mega bisi diatur beserimbai enggau pengerami pesta benak sepengelama tiga hari dipejalaika.
Aum tu digulu pengari ari Opis Menteri Nembiak, Lumba enggau Pemansang Orang Dagang Sarawak (MYSED), Opis Menteri Dagang Temuai, Seni enggau Main Asal ( MOTAC) enggau tetiap ejensi ti udah dikangau datai dikena nerangka tangkup pengawa sida maya pengerami nya ila.
