SERIAN, 20 April: Rayat ke mendam di sitak Kunsil Nengeri (DUN) Kedup diperansang ngaul diri ba pengawa kebun bedandang besai sereta numbuhka kerejasama enggau pemeranak puku.
Kaban Kunsil Nengeri (ADUN) Kedup, Martin Ben madahka, tuju nya dikena ngemansangka agi aktiviti bekebun ti tau mansutka asil ke lebih mayuh sereta nambahka asil penatai pemisi raban pekebun.
“Kitai nguji deka mai pemeranak puku mantu ngemansangka tanah ba endur tu. Pia mega, orang ke ngempu tanah ke besai ulih ngemansangka tanah nya kediri empu sereta minta sekeda ari tanah nya dikemansangka pemeranak puku enggau chara komersial,” ku iya madah.
Martin ke mega Sapit Menteri Pemansang Kandang Menua nerangka, sebedau nya mayuh macham program enggau bantu betanam betupi ke udah dipejalaika di DUN Kedup ti nyerangkung subsidi padi, sum enggau perengka ke diguna ba pengawa betanam betupi ke bukai.
Berebak ari nya, iya madahka, perambu ari Opis Menteri Betanam Betupi enggau Pemansang Kandang Menua enggau Opis Betanam Betupi nya deka diterangka ngagai rayat nengah program randau awakka sida meretika senentang tuju pekara nya dipejalaika sereta nyikap diri bekerejasama enggau pemeranak puku jemah ila enti sema sida setuju.
“Kitai deka ninga sereta meda baka ni timbal sida seraya nerangka sekeda pekara ke patut tauka deka ditemu. Tu berindikk ari engka bisi rayat ke bedau nemu tauka mereti senentang pengawa betanam betupi chara komersial tu,” ku iya madah ngagai pengarang berita TVS sepengudah nurun ngabas sekeda endur ungkup pengawa nanam padi di DUN Kedup lebuh Hari Dua.
Ku iya madah agi, pengawa Kebun bedandang besai entara pekara ti deka dikemesaika di sitak nya seriris enggau juluk perintah Sarawak ti deka ngemansangka sereta ngemodenka sektor betanam betupi di nengeri tu.
