KUCHING, 20 April: Tetiap iku orang ngembuan tangkup pengawa ke sama nagang sereta nyeliahka isu menyati seksual ke ngaul orang indu, nembiak mit indu enggau nembiak mit lelaki.
Menteri Pemansang Orang Indu, Nembiak Mit enggau Pengelantang Komuniti, Dato Sri Fatimah Abdullah madahka, orang ke kala dipenyati seksual mesti ngeripot pekara nya ngagai polis tauka ejensi ke bekaul kelimpah ari madah ngagai orang ti dipechaya.
“Isu menyati seksual tu suah diripotka nyadi di endur gawa, buding sekula enggau sekeda endur ke digulu mensia mayuh,” ku iya madah.
Sebedau tu, Fatimah nerangka, opis menteri iya udah ngatur aum media bekaul enggau isu penyati seksual ke ngaul nembiak lelaki ti jarang diberi perati.
“Tang, diatu pekara baka nya bisi nyadi kemaya hari tu. Nembiak mit lelaki mega ulih nyadi orang ke dipenyati seksual. Ambika chunto, sida ke diau ba buding sekula,” ku iya madah rambau aum pengarang berita lebuh Hari Dua.
Beduduk ari nya, Fatimah nerangka senentang orang ke dipenyati seksual mesti ngaga ripot pekara nya awakka orang ke ngereja peyalah nya ulih ditangkap sereta ulih sida ke enda menuku nya ulih dipuntanka.
“Nyadi, sida ke dipenyati seksual mesti ngeripot pekara nya awakka ulah orang ke menyati seksual ulih ditagang enggau diseliahka.
“Orang ke dipenyati seksual mega deka trauma sereta begunaka timpuh deka pulai manah baka selama. Lebih agi mulaika pemanah ba asai ati sida,” ku iya madah agi.
Nangkan ke nya, sida ke kala dipenyati seksual mega begunaka sukung enggau sanding penemu ari orang bukai ti nyerangkung diri sebilik, kaban ke semak sereta ari ejensi perintah ke bekaul.
Tuju nya, dikena nyeliahka sida napi penanggul tusut runding, ti ngujungka sida teparuk deka ngereja pengawa ke enda patut.
Fatimah mega ngelalau apai indai, pengajar sereta komuniti ngambika meri perati sereta bejalaika tangkup pengawa ngeripotka pekara nya enti sema sida bisi nerima penerang tauka ripot bekaul enggau isu menyati seksual. – TVS
