KUALA LUMPUR, 17 April: Perintah Sarawak endang ngemeratka pengelantang rayat pupu bansa enggau batang pengarap di nengeri tu.
Premier Sarawak Datuk Patinggi Tan Sri Abang Johari Tun Openg madahka, pengelantang rayat Sarawak ke gawa enggau nampung pelajar di Semenanjung mega dikemeratka perintah nengeri.
Iya madahka, perintah Gabungan Parti Sarawak (GPS) senaka ulih mantu enggau bejalaika pekara ke patut ungkup pengelantang rayat asal nengeri tu napi pemar pengidup kemaya hari tu.
“Naka ke diatu, penyampau 38,106 iku orang ti nyengkaum 21,214 iku nembiak enggau 16,892 iku mensia mayuh udah diberi bantu baka pemakai, endur diau, perubat, penerebai bilun sereta nganjung pulai tubuh orang ke udah nadai pulai ke Sarawak,” ku iya madah.
Berebak ari nya, Abang Johari nyemetak madahka, kenyau ari Atur Nagang Pemindah (PKP) ti dipejalaika ba taun 2020 nyentuk ke diatu, perintah GPS agi sereta terus mantu rayat Sarawak ke mendam di Semenanjung enggau di menua luar.
Iya mansutka jaku nya ba Pengerami Buka Puasa ‘Sungkei Dengan Premier Abang Jo 2020’ lebuh Hari Enam.
Temuai bukai ke bisi ngulu program nya, Sapit Premier Dato Sri Dr Sim Kui Hian, Datuk Amar Awang Tengah Ali Hasan, Menteri di Opis Menteri Besai (Undang-undang enggau Parlimen) Dato Sri Wan Junaidi Tuanku Jaafar, Speaker DUN Sarawak, Datuk Amar Haji Mohamad Asfia bin Awang Nassar enggau sekeda menteri kabinet ba renggat perintah besai.
Gambar: Pejabat Premier Sarawak
