KUCHING, 17 April: Sapit Premier Sarawak, Datuk Amar Douglas Uggah embas minta bala tuai bansa enggau pengari rayat madah ngagai iya enti sema bisi projek rayat digaga enda nitihka spesifikasyen tauka standard ke patut.
Iya nyemetak madahka, tuai raban bansa mesti nyadi jematan , mata enggau pending perintah tebal agi ba pekara ke bekaul enggau pemansang.
Ba dalam siti penerang ku iya madah, tetiap projek rayat enda ngira ba baruh Projek Transformasyen Menua Pesisir (RTP) , Projek Mit Menua Pesisir (MRP) tauka ari perintah besai mesti nitihka standard Opis Kereja Raya (JKR) ke udah ditetapka.
Ambika banding baka projek ngaga jematan, jalai alun enggau ke bukai ti udah dikemendarka mesti digaga nitihka standard JKR ti nyengkaum barang ke diguna, kualiti, kuantiti, saiz tauka pekara ke bukai.
“Semua tu udah diterangka ba dalam ripot perengka berumah ngagai kunteriktor. Nyadi, isu projek sekalika tembu digaga enda nitihka standard enda patut nyadi,”ku iya.
Uggah ke mega Menteri Infrastrakcha enggau Pemansang Penyangkai Kapal madahka, enti sema projek ke digaga enda tembu nitihka atur ke patut tau ngasaka ati taja pan agih belanja ungkup projek nya udah diberi.
Ku iya madah, semua projek pemansang patut meri pengelantang ke rayat.
Semua projek nya patut meri pemaik ngagai rayat, ukai nyadi kebuah sida dikena bekerakar enggau perintah ketegal enda puas ati.
