MUKAH, 15 April: Raban kunteriktor dijangka ulih bejalaika pengawa ngaga projek ke udah diberi nitihka timpuh ke udah ditetapka.
Kaban Kunsil Nengeri (ADUN) Daro, Safiee Ahmad madahka, kunteriktor dipinta lengkas agi nembuka projek berindik ari menua diatu udah ngalih ke renggat endemik.
“Kitai endang nemu sekumbang menua dituntung penusah pandemik ba taun 2020 mayuh projek ke digaga tejanggal ketegal Atur Nagang Pemindah (PKP) ti diteritka di serata menua.
“Tang, diatu menua udah ngalih ke renggat endemik. Nyadi, aku chukup pechaya mayuh udah projek diatu benung ranchak digaga,” ku iya madah sepengudah ninga licha senentang pengerembai pemadu baru ari Opis Parit enggau Entali Ai Bagi Menua Mukah bekaul projek ngaga Jalai Kampung Penasu ke Nanga Semah, Daro lebuh Hari Empat.
Safiee nerangka, projek jalai nya ti dikemendarka Premier Sarawak Datuk Patinggi Abang Johari Tun Openg lebuh nemuai seraya kereja ke Kampung Penasu ba taun 2018 ke udah chukup beguna nyadi jalai penyambung ngagai peranak ke mendam ba semak dia ti sebedau tu semina nguna perengka pengangkut ai.
Ku iya madah, penembu projek nya deka meri empas pemansang ngagai rayat di pelilih nya tebal agi mantu nyungkak tikas sosio ekonomi sida ba pengawa bedajaka asil kebun enggau asil ari pengawa berikan.
