KUCHING, 14 April: Sarawak endang dikelala kaya enggau mayuh macham main asal enggau muzik ti dikemeranka rayat pupu bansa.
Tetiap etnik enggau bansa di nengeri tu bisi lagu tradisional ke ditengkebang, muzik enggau tiun ti ditusun manah awakka nyamai didinga.
Beduduk ari nya, Kulleh Comrades raban pemerindang ari tanah Kenyalang tu deka mai pemanah, penyelai enggau pengaya muzik tu ke renggat entarabansa beserimbai enggau Program Pemandang Seni Entarabansa Ke-59 tauka Venice Biannale 2022 di Itali.
Kulleh Comrades iya nya projek muzik ti mantaika muzik eksperimental ti ngangkatka tradisyen rayat Sarawak ke nyerangkung lagu rayat, pelandai enggau balada Nusantara.
Raban tu deka mantaika pengelandik sida ba malam program bejadika Aabaakwad tauka lenyau sepengudah ribut di Conservatorio Di Musica Benedetto Marcello Di Venezia kena 22 April 2022.
Tuai Raban Kulleh Comrades, Kulleh Grasi madahka, sida seraban berasai gaga ati laban dikangau ngambi bagi ba dalam program besai baka nya di renggat dunya.
“Nyadi rayat Sarawak ti dikangau ngambi bagi ba dalam Venice Biannale nengah Semi Pavilion, siti program ke dikumbai Aabaakward ngasuh kami temegah ati enggau diberi basa laban ulih ngaul diri ba dalam program besai baka tu,” ku iya madah.
Aabaakward iya nya siti program begempuru entarabansa ti digulu raban artis, kurator sereta tebangkar ari Sarawak ba Venice Biennale 2022 awakka sama ngerami seraya ngangkatka pesaka lama peranak asal.
Beduduk ari nya, Kulleh Comrades mega deka ngambi bagi ba dalam aum panel enggau pengawa nyadaka pelandai ba sepemanjai timpuh gempuru entarabansa nya diatur.
Kulleh ke mega siku penanyi, penengkebang leka lagu enggau pengarang pelandai arapka ejensi ke bekaul ulih meri sukung enggau sanding penemu ngagai raban sida lebih agi ba sekeda pekara ke patut.
“Ba penemu aku, peluang baka tu datai sekali dalam pengidup laban program ke ngaul orang asal tebal agi ari Sarawak enggau ari Asia Tenggara lalu serak tu kitai keterubah dikangau ngambi bagi ba dalam alumni Venice Biannale.
“Nyadi, kami endang begunaka sukung ari ejensi ke bekaul, nyukung anak seni ari Sarawak. Kami deka mai nama Sarawak enggau Malaysia ke menua luar lebih agi lebuh nyereta Venice Biannale sereta ngambi bagi ba aum senentang ekosistem seni orang asal di renggat global,” ku iya madah ngagai pemberita TVS.
Kulleh Comrades iya nya projek muzik orang asal ti disereta Kulleh Grasi, Jenn Rossem, Stanny Benedict, Nelson sabi, Mathew Dalin Micheal Mowet enggau Gabriel Fairuz Louis. – TVS
