KUCHING, 2 April: Siti komiti khas deka ditumbuhka ke tuju dikena ngurangka bepanggai ngagai import seraya negapka agi sekuriti pemakai menua.
Menteri Betanam Betupi Moden, Tanah Adat Enggau Pemansang Kandang Menua (Manred) Datuk Seri Dr Rundi Utom madahka, penumbuh komiti khas tu deka digaga nengah kerejasama enggau perintah besai.
Ku iya madah, pengawa nempa kerejasama nya udah diperundingka enggau Menteri Betanam Betupi enggau Industri Pemakai (MAFI) Datuk Seri Dr Ronald Kiandee.
“ Kitai deka ngatur aum, penyerta baka ke udah diperambu, kitai deka numbuhka ‘taskforce’ kediri dikena mutarka pekara tu,” ku iya.
Iya mansutka jaku nya maya bejaku ba pengerami Makai Malam Begulai Enggau Menteri Betanam Betupi Enggau Industri Pemakai (MAFI) Datuk Seri Dr Ronald Kiandee, lebuh Hari Lima.
Rundi madahka, nengah Langgur Pemansang Malaysia Lumpar Ke-12 (RMK-12) opis menteri iya nerima agih sepenyampau RM617.9 juta ari perintah besai enggau perintah Sarawak dikena bejalaika mayuh bengkah projek ungkup rayat.
Ari penyampau nya, bisi 52.5 peratus diserahka perintah besai dikena negapka sektor betanam betupi Sarawak.
Berebak enggau nya, Sarawak benung chakah ngangkatka pengeluar pemakai domestik dikena nyukung polisi sekuriti pemakai menua.
