MIRI, 26 Mac: ‘flyover’ Simpang Institut Kemahiran Belia Negara (IKBN) , Permyjaya Miri deka dibuka 31 Mac tu.
Menteri Perengka Pengangkut, Dato Sri Lee Kim Shin madahka, naka ke diatu projek agi ba renggat kepenudi diperesa dikena nentuka ‘flyover’ nya ke ngembuan pemanjai 605 meter likun sebedau dibuka ngagai mensia mayuh.
Lee ke mega Kaban Kunsil Nengeri (ADUN) Senadin madahka, projek tu mega digaga ba baruh pakej projek jalai besai pan borneo ti mungkur jalai alun begembar dua enggau bisi empat lurung.
“Tu nyengkaum pengawa ngaduka tanda pengelikun sereta nentuka sukut pengelikun ulih dititihka mensia mayuh,”ku iya pengudah matau projek ‘flyover’ simpang Institut Kemahiran Belia Negara (IKBN) lebuh Hari Lima.
Nangkanka nya, Opis Kereja Raya (JKR) deka ngaduka sebuah lampu trafik ba entara jalai alun nya nuju ke Vista Perdana.
Taja ukai dalam perambu projek nya, tang ketegal peminta ari peranak kandang menua nya, inisiatif tu dipejalaika JKR ke pengelantang penguna jalai alun.
Ku iya madah, penembu projek jalai tu mega deka mantu mutarka penyekut jalai alun ba endur Vista perdana, Southlake enggau Desa Pujut Permyjaya lebih agi maya jam orang nurun gawa.
