KUALA LUMPUR, 25 Mac: Polis Diraja Malaysia (PDRM) mujur mandangka penyulut mantu nurunka indeks jenayah menua seraya ngayanka kredibiliti ke tinggi nyaga pengelikun menua.
Menteri Besai Datuk Seri Ismail Sabri Yaakob madahka, taja pan nyau semak semua raban digerah bejalaika Op COVID-19, PDRM tetap senaka ulih nyemelaka pengawa iya nya entara nagang jenayah enggau nyaga pengelantang rayat ungkup pengelikun semua.
Ismail Sabri madahka, jenayah indeks ba taun 2021 mandangka penurun iya nya 52,974 kes ti dibanding 65,623 kes ba taun 2020.
Iya nerangka, ari timpuh bulan Januari nyentuk ke bulan Februari taun tu, jenayah indeks nurun ngagai 8,484 kes ti dibanding 9,773 kes ba dalam timpuh ke sama ba taun siti nyin suba.
“Perintah beterima kasih ngagai raban PDRM laban udah bebendar gawa, ngelaban ujan enggau panas, sereta sanggup napi risiko dirampit enggau nempuh penusah ngenyit,” ku iya madah beserimbai enggau pengerami Peringatan Hari Polis ke-215 di Pusat Latihan Polis (Pulapol) lebuh Hari Lima.
Ismail Sabri mega meri pengaga ati ngagai raban turut PDRM, ti nyadi raban gawa di luan ke semampai mantu ngelempungka tating Keluarga Malaysia lebuh menua dituntung pandemik COVID-19.
Berindik ari menua deka ngalih ngagai renggat endemik ba pun ari 1 April, iya minta rayat terus bekerejasama ngasika Standard Atur Pengawa (SOP) lebih agi nguna sengkabung mua.
Menteri Besai nya mega madahka, perintah endang nemu pengawa nyadi polis kemya hari tu majak mayuh pemar lebih agi enggau pemisi teknologi sereta mayuh macham aplikasyen media rama ke disalah guna dikena ngereja penyalah tauka jenayah.
