KUALA LUMPUR, 24 Mac: Pengawa bejalaika pelasar bekaul enggau ngisi pangku pengawa tuai opis di renggat perintah besai di Sabah enggau Sarawak deka dikemeratka ba dalam pekara Borneonisasi awakka diisi anak ari negeri Sabah enggau bumiputera Sarawak.
Ku Menteri di Opis Menteri Besai (Pekara Sabah & Sarawak) Datuk Seri Dr Maximus Ongkili madah, nyentuk ke diatu semua 109 pangku pengawa tuai opis di opis renggat perintah besai di Sabah udah diisi penuh enggau 54 iku tauka 49.5 peratus anak Sabah.
Nangkan ke nya, iya madahka ba nengeri Sarawak, ari 117 pangku pengawa tuai opis di renggat perintah besai di nengeri tu, 109 iku pangku pengawa udah diisi enggau 68 iku tauka 64 peratus ari anak Sarawak.
“Sepengudah Majlis Khas Perjanjian Malaysia 1963 (MA63) ditumbuhka, perambu senentang bejalaika pekar Borneonisasi ti keterubah udah dibantaika ba dalam komiti kereja ba baruh kaunsil nya, ti dikangauka Jawatankuasa Sosio Ekonomi (JKSE) kena 18 Februari ke udah.
“Ari sukut perambu, entara pekara ti diaum iya nya ngaul ngemeratka pengawa ngambi sereta nambahka penyereta raban nembiak ari Sabah enggau Sarawak ba dalam servis perintah di renggat perintah besai,” ku iya madah rambau ditanya ba Dewan Rakyat lebuh Hari Empat.
Iya mansutka jaku nya lebuh nyaut tanya ari Kaban Parlimen Lubok Antu Jugah Muyang senentang perambu perintah Besai deka ngelengkaska pekara Borneonisasi dipejalaika seriris enggau MA63 sereta Perkara 20 (Sabah) enggau Perkara 18 (Sarawak).
