KUCHING, 20 Mac: Sarawak kena hari minggu ngerikodka empat kes pemati ketegal Covid-19 ti ngaul orang lunggar umur ke beumur entara 60 nyentuk 82 taun.
Komiti Mutarka Penusah Ngenyit Nengeri (JPBN) Sarawak dalam siti penerang madahka, kes pemati ti dirikodka tu bisi sejarah penyakit komorbid.
Ba awak ke sama, JPBN madahka bisi 852 kes positif baru Covid-19 dirikodka di Sarawak.
Ari penyampau nya, 844 kes ba baruh kategori 1 enggau 2, lapan kes ba ketegori 3, 4 enggau 5 ti nyadika penyampau kes kumulatif nambah ngagai 287,847 kes.
Kuching mengkang ngerikodka kes ninting hari positif Covid-19 pemadu tinggi iya nya 305 kes, ditangkanka Miri 147 kes enggau Sibu 86 kes.
Nangkanka nya, bisi enam kluster bedau pukas naka ke diatu.
