SRI AMAN, 17 Mac : Projek Ngemanahka Jalai Alun Ulu Paku, Undop ke beungkus sepenyampau RM 30 juta dijangka tembu 12 Julai 2023.
Sapit Menteri Pemansang Pengelandik, MEITD, Datuk Francis Harden Hollis madahka, penembu projek jalai tu ila deka meri pemaik ngagai peranak kandang menua nya ngembuan infrastrakcha jalai alun ke lebih manah.
Ku iya madah, projek jalai sepemanjai 8km tu nguna agih belanja nengah Opis Menteri Pemansang Menua Pesisir (KPLB).
Pengawa ngaga projek jalai tu begunaka timpuh pengelama 18 bulan ti udah berengkah digaga kena 19 Januari tu tadi.
“Diatu kitai udah meda kediri empu pemendar KPLB, Opis Kereja Raya (JKR) enggau kunteriktor ngaga projek tu ke pengelantang komuniti,” ku iya madah rambau bejadika Pengerami Nasih Tanah Projek Ngemanahka jalai Uku Paku, Undop, Sri Aman lebuh Hari Tiga.
Harden ke mega Kaban Kunsil Nengeri (ADUN) Simanggang madahka, projek tu kala napi penanggul ketegal perintah besai betukar sebedau diambi perintah Sarawak lalu dipejalaika ba baruh pegai JKR Wilayah, Wilayah Selatan ti nyadi ejensi bejalaika projek.
Ba pengerami nya mega bisi diatur pengawa nyerahka taba projek ngagai kunteriktor ti dipilih nguna chara tinda.
Harden nyemetak madah, perintah Gabungan Parti Sarawak (GPS) seruran mai pemansang ke rayat enda ngira maya.
“Kitai dalam perintah GPS seruran deka mai pemansang enda ngira maya. Endang amat! Udah tanggungpengawa perintah nyendiaka pemansang infrastrakcha ke rayat tang pekara tu begunaka sukung ari peranak menua tu,” ku iya.
Nangkanka nya, di kandang menua Undop ba pun ari Kampung Guntong kereja masang paip ai benung digaga nyengkaum sekeda meter ai rumah panjai.
Ku iya madah, agih belanja ungkup bejalaika projek tu iya nya sepenyampau RM42 juta
