KUCHING, 17 Mac: Nembiak Palan Pelajar Tinggi (IPT) ari ruang bilik B40 ulih minta bantu tablet ba baruh Pakej PerantiSiswa Keluarga Malaysia ti berengkah dibuka tengan bulan April tu.
Menteri Komunikasyen enggau Multimedia Tan Sri Annuar Musa madahka, bisi 400, 000 iku nembiak di serata menua dijangka deka nerima pemaik ari inisiatif tu.
“Berengkah tengan bulan baru (April) kitai deka muka peminta ngagai nembiak di IPTA, IPTS, Kolej Komuniti enggau kolej ba baruh KPT lebih agi ungkup raban seranta enggau B40 ti bepenatai pemisi baruh RM4,850 sebulan ulih minta peranti (tablet) ke ulih diguna sida maya belajar,” ku iya.
Iya mansutka jaku nya maya nyimpul mosyen ‘menjunjung kasih titah diraja’ ungkup opis menteri nya di Dewan Rakyat lebuh Hari Empat.
Pakej Perantisiswa Keluarga Malaysia ti dibantaika dalam Bajet 2022 seriris enggau juluk perintah deka nembiak IPT bisi tablet ke bekualiti sereta akses internet.
Ku iya madah, pekara tu beguna amat dikena mantu nembiak IPT ngulihka infomasyen lebih agi ba pengawa pansik enggau ke bukai.
