KUCHING, 18 Feb: Perintah besai komited dalam ngemansangka nguna teknologi robotik ti sebagi ari teknologi ke beguna ba pemansang menua nengah Pelan Hala Tuju Robotik Negara (NRR).
Pekara nya udah dipesetuju ba Aum Kaunsil Ekonomi Digital Enggau Revolusyen Industri Keempat Menua (MED4IRN) ti bechairmanka Menteri Besai, Datuk Sri Ismail Sabri Yaakob.
“Nengah pelin tu, dijangka produktiviti menua ulih diangkatka agi lalu deka ulih ngurangka bepanggai ba pekereja ari menua luar kelimpah minimumka keluar masuk mata duit menua,”ku iya dalam laman facebook iya lebuh Hari Lima.
Ku iya madah, ari taun 2019, pemayuh robot di Malaysia ungkup tetiap 10,000 iku pekereja iya nya 55 unit lalu ba taun 2030 deka nyapai 195 unit ungkup tetiap 10,000 iku pekereja.
Ba awak ke sama, aum nya mega nyukung Konsep Projek Pemangkin (Catalytic Projects) dikena nyungkak ‘Aspirasi Mydigital’ .
“Dalam Konsep Projek Pemangkin, raban pengereja pengawa ti ditumbuhka ulih milih projek ke engkeman enggau matau projek kerejasama entara sektor perintah enggau peribit ( Public-Private Partnership),” ku iya.
Ku iya madah, projek pemangkin tu nyengkaum penumbuh sepital ti nguna teknologi 5g dikena ngangkatka tikas palan nyaga pengerai rayat enggau mengeri pintar.
Ba aum nya mega, bisi dibantaika senentang pemujur Pelan Jalinan Digital Negara (JENDELA), Digital Nasional Berhad enggau Program Negapka Nguna Digital Pedagang Mit (PUPUK).
