KUCHING, 17 Feb: Penyakit riman tusu diripotka mengkang nyadi pemunuh lumur satu ti ditapi raban orang indu di Malaysia iya nya 33.9 peratus.
Menteri Pengerai, Khairy Jamaluddin madah, tu ditangkanka sakit riman kolorektal (10.7 peratus) enggau riman serviks (6.2 peratus).
Bisi tiga bansa penyakit riman ke suah nyadi di Malaysia ba raban orang lelaki iya nya kolorektal (16.9 peratus), lempuang (14.8 peratus) enggau prostat (8.1 peratus).
Ku iya madah, siku ari semilan orang indu dipelabaka deka kena sakit riman.
Penyampau kes nabanka nyawa ketegal sakit riman dirintaika nyadi penyakit pemadu tinggi di sepital peribit iya nya 34.95 peratus
Berebak enggau nya, perintah ngungkupka agih belanja ke besai ungkup tuju nya ke beungkus sepenyampau RM137 juta.
Dikena nyeliahka riman tusu, raban orang indu diperansang beperesa tumu ngambika tumu ditemu awakka penyakit nya ulih diperubat kelimpah ngemeranka gaya pengidup ti bepengerai.
“Nitihka pansik, 30 peratus nyentuk 50 peratus sakit riman ulih diseliahka enggau ngemeranka gaya idup ti bepengerai.
“nagang penyakit tu beguna amat, berebak enggau nya promosi pengerai beguna nyadika chara dikena nyungkak pemereti ati mensia mayuh ngemeranka gaya idup bepengerai seraya ngurangka risiko,” ku iya beserimbai Hari Kanser Peringkat KKM lebuh Hari Empat.
Ba pengawa nya mega, Khairy ngelancharka bup ‘National Strategic Plan for Cancer Control Programme (NSPCCP) 2021-2025 enggau bup ‘National Strategic Plan for Colorectal Cancer (NSPCRC) 2021-2025.’.
