KAPIT, 4 Feb: Kaban Parlimen Hulu Rajang, Datuk Wilson Ugak Kumbong nyuaka chek pampas tanah ungkup Projek Ejensi Pemansang Ulu Rajang (URDA) sepenyampau RM3,065,000 ngagai 120 iku penerima.
Pengawa tu diatur ba bilik aum opis tanah enggau survei Kapit, lebuh Hari Lima.
Ku Ugak madah, bayar pampas tu iya nya ungkup Renggat 1 (Seksyen 1 enggau 2) projek jalai ari Nanga Serau ke rumah tuanku Nanga Sepilok, Nanga Gaat sepemanjai 16 kilometer.
” Naka diatu pampas ke udah dibayar iya nya kurang lebih RM 3,065,000 ringgit udah dibayar ngagai 120 iku penerima.
“Nyadi nya siti ari pemansang diaduka perintah GPS iya nya siti pemansang nengah projek URDA di sitak Baleh,” ku iya madah ngagai TVS lebuh Hari Lima.
Iya beterima kasih ngagai Kepala Menteri, Datuk Patinggi Tan Sri Abang Johari Tun Openg enggau Sapit Kepala Menteri Lama, Niang Tan Sri James Jemut Masing ti udah ngemendarka projek jalai nya.
Ba awak ke sama, iya madahka, projek ngaga jalai renggat 2 sepemanjai 9 km diatu benung dalam perambu enggau iya empu deka ngenataika pekara nya ngagai kepala menteri ila.
Sama bisi datai ngulu aum tu iya nya Kaban Kunsil Nengeri Baleh, Nicholas Kudi Jantai , Residen Bagi Menua Kapit, Nyurak Keti, Pegawai Pelilih Bukit Mabong, Robert Liman, Tuai Opis Tanah enggau Survei Bagi Menua Kapit, Tuan Sagu enggau Pengari Pegawai URDA.
