KUCHING, 30 JAN: Kaban Kunsil Nengeri (ADUN) Simanggang, Datuk Francis Harden Hollis deka bejalaika ‘post-mortem’ beratika kebuah sukung pengundi majak bekurang ngagai chalun enggau parti ba kerusi Simanggang maya Pengawa Bepilih Nengeri (PRN) Sarawak ke-12 empai lama.
Harden ke mega Menteri Muda Pemansang Pengelandik madahka, post-mortem tu dipejalai dikena mansik pengurang chalun enggau Parti matak baru pengandal rayat ke perintah.
“Aku meri terima kasih ke sukung pengundi ti udah mantu pengari ari Gabungan Parti Sarawak sitak Simanggang menang ba PRN ke suba,”ku iya maya Pengerami Meri Selamat Ngagai raban Pengawa Bepilih GPS PRN12 Bagi Bansa Cina enggau Pengerami Taun Baru Cina (TBC) 2022 di sebuah restoran di Sri Aman, kemari.
Ku iya madah, taja menang ba PRN12 tu tadi tang sukung majoriti ari pengundi agi kurang enggau pekara nya deka diberi perati.
Ba PRN12 ke suba, Harden menang 3,954 undi enggau majoriti 175 undi ngalahka chalun Parti Bumi Kenyalang (PBK) Peli Aron, Chalun Parti Tindakan Demokratik (DAP) Leon Jimat Donald enggau Chalun Parti Sarawak Bersatu (PSB) Wilson Entabang.
Ba awak ke sama, Harden ngelalau rayat terus ti ngintu Taun Baru Cina ngemeranka garis lalau Standard Atur Pengawa (SOP) dikena nyeliahka pengekai igi penyakit Covid-19.
Ba pengerami nya mega, bisi diatur pengawa nyerahka bantu ngagai raban lunggar umur ke beumur 70 taun ke atas beserimbai pengerami Taun Baru Cina.
Sama bisi datai iya nya Sapit Kepala Menteri, Dato Sri Dr Sim Kui Hian ke mega Presiden SUPP enggau Menteri Pengerai Mensia MAyuh, Pengawa Berumah enggau Kaunsil Kandang Menua.
