KUCHING, 29 Jan: “Anang belaya enggau diri menyadi” nya entara pesan kepenudi niang Tuai Megai Menua (TYT) Sarawak ke lama, Tun Pehin Sri Abang Mohammad Salahuddin ngagai anak iya Hafizul Ahmad Salahuddin.
Hafizul madahka, apai iya suah mesan nyaga manah bala menyadi laban indai sida udah nadai lalu tanggungpengawa nyadi tuai bilik bepanggai ba iya.
Lebuh ke ngenang, iya madahka apai iya orang ti manah budi, rindu betundi sereta bejalai ngelantangka ati.
“Mayuh enti dikeingat, meri iya mandi, makai, nyaga iya pengudah indai udah nadai, mai iya bejalai enggau iya rindu makai ba kopitiam,”ku iya.
Niang Tun Salahuddin mutuska seput urung pukul 11:45 malam Hari Lima di sepital Normah Kuching.
Niang udah dikuburka ba pendam pengarap Islam di Samariang Kuching pukul 2:25 ngalih hari tadi.
