KUCHING, 28 Jan: Pukat iya nya siti ari perengka ke diguna raban orang berikan begigaka lauk baka ikan.
Tang, ba sebengkah menua di Ulu Ai Delok, Lubok Antu pukat perengka ke beguna ba pengawa orang bumai bekebun.
Tu laban, pukat nyadika pagar umai peranak ba kandang endur nya dikena nyeliahka umai ari dikachau jelu siga.
Seriris enggau pemansang kemaya ari tu, pukat ukai semua diguna ba aktiviti berikan tang diguna nyadika pagar kena nagang jelu ari makai utai tanam lebih agi sida ti bumai di menua ulu endur menua ke agi mayuh kampung.
Nitihka Urai Jarau, sida ti menua Ulu Delok mayuh begunaka pukat ba tetiap umai.
Pukat nya dipasang ngelingi tisi umai ari pun nyentuk ke ujung lalu pengawa ngaga nya begunaka timpuh laban didirika enggau kayu ngambika pukat dipasang chukup likun.
Ku iya madah, pukat ke diguna mega pukat ke besai sereta tan nitihka pemesai umai.
“Kebuah orang ngaduka pukat ba umai dikena nyaga utai tanam ba umai ari dikachau jelu baka kera, nyumbuh, rusa enggau ke bukai. Semua nya ditagang magang, nyadi lebuh bisi pukat tu enda sida ulih tama ke umai,”ku iya bedau lama ti udah.
Kelimpah dikena nyaga umai, pukat mega ke tuju dikena nandaka entara bagi sepiak-sepiak umai sesiku sereta nyaga pengelikun jalai mensia mayuh ti nengah umai nya.
Ku iya madah, taja pengawa ngaduka pukat ba umai begunaka timpuh enggau mayuh kelikuh tang chara nya dipeda ngemudahka pengawa bumai sida.
“Kekadang sehari aja enda ulih ngapuska pengawa nirika pukat ngelingi umai, laban pengawa tu begunaka kayuh, ngidar pukat agi enda ulih siku tubuh lalu begunaka timpuh nitihka pemesai umai,” ku iya.
