KUCHING, 28 Jan: Bantu Khas Sarawakku Sayang (BKSS) 8.0 dilancharka Kepala Menteri Datuk Patinggi Tan Sri Abang Johari Tun Openg pagi tadi ti nyerangkung tujuh pekara diberi enggau chara diskaun utiliti.
Pakej BKSS beungkus lebih RM285 juta enggau nya entara bantu ke pemadu besai kala diungkupka perintah Sarawak dikena ngurangka tating rayat.
Bantu tu mega diberi pengelama enam bulan keterubah ba taun 2022.
Abang Johari madah, entara inisiatif dikena mantu rayat seraya mulaika baru pemanah ekonomi menua ba dalam pakej BKSS tu iya nya diskaun bil elektrik 5 peratus nyentuk 25 peratus, diskaun bil ai 10 peratus ngagai 25 peratus, diskaun 50 peratus suwa Skim Rumah Ejensi Pemansang Pengawa Berumah Sarawak (HDC) enggau diskaun 50 peratus suwa pasar engau bansal.
“Bantu tu komitmen perintah Sarawak dalam mulaika pemanah sosioekonomi ke pengelantang rayat baka pakej BKSS sebedau tu,” ku iya
Iya mansutka jaku nya ba aum media khas Bantu Khas Sarawakku Sayang (BKSS) 8.0 di Wisma Bapa Malaysia, sehari tu tadi.
Ba awak ke sama ,bantu duit sekali bayar RM1000 nengah Sarawak Pay ke beungkus sepenyampau RM87.5 juta mega disediaka perintah ti meri pemaik ngagai 87,500 iku pedaja.
Kelimpah ari nya bantu duit BKSS RM500 sekali bayar diberi ngagai pengemeran bot, teksi, bas enggau van ke belisin.
Berindik ari menua diatu udah ngalih ngagai fasa empat pelin mulaika pemanah menua (PPN) ke alai semua sektor ekonomi enggau rama mayuh udah dibuka, nya kebuah bantu duit sekali bayar diberi ngagai pengemeran sektor nya.
Ku iya madah, bantu nya ngayanka perintah komited dalam nyaga pengelantang rayat Sarawak.
