KUCHING, 24 Dis : Ba musim pengerami tu, rayat Sarawak patut muai ulah ti enda ibuh ti madahka ‘enda ngawa’ laban nadai siku kitai kebal ari virus penyakit COVID-19 tebal agi varian Omicron.
Kaban Kunsil Negeri (ADUN) Bukit Saban, Datuk Amar Douglas Uggah Embas nyemetak madahka, tetiap iku rayat ngembuan tanggungpengawa ke sebaka besaup nagang enggau nyeliahka varian Omicron majak ngekai di negeri tu.
Uggah madahka, naka ke diatu, kes postif COVID-19 enggau kes orang ke dipasuk ke sepital ketegal penyakit nya majak ngayanka penurun.
Entudika nya, iya madahka ngagai orang ti deka pulai ke menua, lebih agi rumah panjai maya musim pengerami tu nyaga pengelikun diri lalu ngasika Standard Atur Pengawa (SOP) dikena nyeliahka diri ari penyakit nya ngerekai ba menua pesisir.
Berebak enggau nya, uggah ngelalau mensia mayuh seruran bejejaga berindik ari gaya hari ti enda tentu manah sepemanjai bulan tu.
“Kita mesti bisi nyimpan lumur telefon ejensi ke bekaul baka Opis Bomba enggau Penyah Penusah, Opis Pengintu Pengelantang Komuniti, raban polis tauka Opis Pelilih enti sema bisi sebarang penusah ke deka nyadi ba musim ujan tu” ku iya madah agi.
Kena 24 Disember 2021, Direktor Institut Pengerai Enggau Perubat Komuniti (IHCM) Universiti Malaysia Sarawak (UNIMAS) Prof. Dr. David Pereira madahka, Sarawak diatu bisi ngerikodka empat kes varian Omicron di pelilih Kuching enggau Bintulu.
Iya mansutka jaku nya ba dalam siti penerang ti dikeluarka sehari tu.
