SRI AMAN, 17 Dis: Sukung ti penuh ari rayat endang beguna ba pengawa bepilih nengeri (PRN) ke-12 Sarawak dikena nentuka pemansang di sitak kunsil nengeri (dun) N.32 Simanggang chakah dipejalaika.
Chalun Gabungan Parti Sarawak (Gps) sitak Simanggang, Datuk Francis Harden Hollis ngarap pengundi meri sukung ti penuh ngagai iya ngetanka kerusi DUN n.32.
Ba awak ke sama Harden meri terima kasih ngagai Kepala Menteri, Datuk Patinggi Tan Sri Abang Johari ti udah meri pengarap ngagai iya bediri baru ngetanka kerusi N.32 ba PRN12.
Ku iya madah, simanggang diatu majak mansang enggau mayuh projek pemansang udah digaga ba endur nya.
“Baka ngaga jalai alun menua pesisir, bekal ai, bekal elekterik enggau sekula menua pesisir. Tebal agi projek tu mayuh nguna agih belanja Projek RTP, ke alai pengari GPS diberi RM5 juta ninting taun.Nyadi kitai nguna agih tu ngambika kitai ulih ngaga projek menua pesisir baka jalai genturung pendiau, ngangkatmanah rumah panjai, mantu nyeruri sekula enggau ngaga dewan mayuhgun,” ku iya dalam laman facebook iya.
Entara sekula diangkatmanah iya nya Sk Paku, Sk Batu Lintang, Undop, Sk Ng Klasen di Batu Lintang ke udah tembu digaga.
Berebak enggau nya iya meransang pengundi nurun ngundi ba PRN12 tu ngambika peratus ngundi nambah seraya projek pemansang ulih diteruska.
