KUCHING, 17 Dis: Chairman Gabungan Parti Sarawak (GPS) Datuk Patinggi Tan Sri Abang Johari Tun Openg nesau rayat nurun ngundi laban undi sida penentu pemansang Sarawak ba Pengawa Bepilih Nengeri Ke-12 tu.
Abang Johari ke mega chalun Kunsil Nengeri Dun Gedong meri jamin GPS seruran nyaga pengelikun rayat, politik ti tegap, ekonomi enggau hak Sarawak.
Tu nyata dipeda ba pemujur Rang Undang-Undang Perlembagaan (Ubah ) 2021 bekait Sempekat Malaysia 1963 (MA63) di Dewan Rakyat kena 14 Disember 12 tu tadi udah dikemendarka.
“ Kami raban GPS seruran nyaga enggau ngetanka hak Sarawak baka ke udah ba dalam Sempekat Malaysia 1963 (MA63), ripot Komiti Entara Perintah (IGC), Perlembagaan Negeri Sarawak enggau Perlembagaan Malaysia,” ku iya dalam siti penerang.
Iya mega madah, GPS deka ngetanka kaul penyerakup pupu bansa ngambika rebak dudi ila ngasaika pengelantang idup begulai.
“ Anang kitai bejudika pengidup dudi hari kitai, kitai patut ngambi nya nyadika teladan ari perintah PH ti semina ulih merintah 22 bulan laban enda chukup tegap,” ku iya.
