KUCHING, 1 Disember: Sarawak endang tebilang enggau pemanah rampa menua nyengkaum kaya enggau pemayuh spesis katak ti ulih nyadi pematak ekodagang temuai baru di nengeri tu.
Menteri Dagang Temuai, Seni enggau Main Asal, Datuk Seri Abdul Karim Rahman Hamzah madahka, nengah Lumba Katak Antarabansa Borneo (Frog Race) bepotensi nyadi pelasar dikena ngelakuka ekodagang temuai.
Berebak enggau nya, pemisi spesis katak tu ulih diguna bejalaika pengawa pansik dikena matak mayuh agi pemansik dokumenka pansik pasal spesis tu ngagai dunya luar.
“Ukai semina ulih matak raban pemansik dokumenka penerang pasal spesis katak tang ulih narit temuai datai ke Sarawak kelimpah ngeranchakka ekonomi nengeri tu,” ku iya dalam teks ke dibacha Sekretari Mendam Opis Menteri Dagang Temuai Seni enggau Main Asal Sarawak, Hii Chang Kee ba Pengerami Nutup Lumba Katak Antarabansa Borneo ke-9 2021 ba Palan Konvensyen Borneo Kuching (BCCK) sehari tu.
Program ke diatur tu nerima sambut ti manah ari mensia mayuh sama bela nganjung beratus gambar spesis.
Ke penerang, Lumba Katak Antarabansa Borneo ke-9 2021 kala diatur kena 1 September nyentuk 29 November nyin tadi.
