KUCHING, 30 November: Projek ngaga selapat bah ari Jalai Masjid ari Lebuh Java nyentuk ke Sungai Sarawak dijangka tembu digaga bulan April 2022.
Projek selapat bah pemanjai 515 meter tu deka ulih mutarka penusah ampuh bah ba Padang Merdeka enggau ngelingi kandang endur nya.
Menteri Muda ba Opis Kepala Menteri (Pekara Islam enggau DBKU) Datuk Dr. Abdul Rahman Junaidi madah, projek tu berengkah digaga kenyau bulan Januari 2018 lalu patut ditembuka kena 12 Januari 2019 tang kunteriktor ti bejalaika projek enda mujur nembuka nya nitihka timpuh ti udah ditetapka.
“Ketegal napi sekeda penanggul, kunteriktor agi enda ulih nembuka projek tu enggau nyadi ‘kritikal’ lebuh betapi enggau pandemik Covid-19 pun taun 2020. Berindik ari agi betapi enggau pandemik, mayuh pengawa begaga ba semua endur tetanggul lalu sekeda tebengkalai nyengkaum projek tu,” ku iya maya nerang sentang status Projek Selapat Bah ba Jalai Masjid-Lebuh Java -Sungai Sarawak sehari tu tadi.
Iya ke mega Menteri Muda Utiliti (Bekal Ai) madah, projek tu dibahagi ngaga tiga renggat ke alai Renggat 1 enggau Renggat 2 udah tembu digaga.
“Entara penanggul ke ditapi kunteriktor iya nya mutarka penanggul utiliti. Utiliti tu baka paip ai lama, kabel elekterik enggau kabel tekomunikasyen ke bisi ba endur tu. Tu mih penanggul ke ditapi kunteriktor,” ku iya.
Nerang silik, iya madahka DBKU udah nyiri kunteriktor penyelamat nembuka projek ti diatu semina tinggal 8 peratus tembu.
