MIRI, 30 November: Pengempu tanah Hak Adat Bansa Asal (NCR) dikearap nemu berunding sereta enda mudah pechaya ke jaku ajum sentang program Nyukat Tanah NCR Inisiatif Baru ti dipejalaika Opis Tanah enggau Survei Sarawak.
Sapit Kepala Menteri Sarawak, Datuk Amar Awang Tengah Ali Hasan madah, perintah Gabungan Parti Sarawak (GPS) endang ngetanka kuasa bempu rayat ba tanah NCR nitihka atur undang-undang.
Ku Awang Tengah madah, jaku ajum sekeda raban semina sementara lebih agi maya semak musim Pengawa Bepilih ti sengapa ngenakutka rayat.
“Tu politik dikena ngenakutka pengempu tanah. Sida tu orang luar ti nadai kuasa ba tanah endur nya, semina bejaku ngapa tang ukai ngetanka tanah NCR,” ku iya ba pengerami Nyerahka Surat Pala Tanah di Lambir, kena Hari Dua.
Ku iya madah, perintah Sarawak naka ulih ngelengkaska proses nyukat tanah NCR dikena nentuka pengempu tanah NCR bisi dokumen ngempu, bagi entara tanah sida ngambika enda dikachau.
Pengempu tanah ti mudah ditipu ulih ngujungka tanah sida enda ulih disukat sereta nadai jamin bulih surat pala tanah ti meri pengerugi ngagai sida.
Ku iya, pengawa nyukat tanah enda ulih dipejalai nyema pengempu tanah enda setuju tanah sida disukut perimeter.
“Kenyau taun 2010 nyentuk diatu Opis Tanah enggau Survei Sarawak udah mujur nyukat tanah perimeter pemesai 1, 011,566 hektar di serata Sarawak.
“Ari penyampau nya 780,203 hektar tanah udah digazet,” ku iya.
Berebak enggau nya, Awang Tengah ngelalau pengempu tanah ti udah nerima surat pala tanah NCR ulih nguna pemaik nya memanah dikena ngemansangka tanah sida.
