SRI AMAN, 28 November: Menteri Muda Pengelantang Komuniti, Datuk Francis Harden Hollis chakah bejalai betemu enggau rayat nengah bemacham program di sitak Kunsil Nengeri (DUN) Simanggang.
Chara tu siti ari pelasar dikena ngenyemakka diri enggau rayat seraya nerangka polisi pemansang ti dibai perintah Gabungan Parti Sarawak (GPS).
Harden ke mega Kaban Kunsil Nengeri (ADUN) kedu Simanggang madahka perintah GPS dijangka agi bekuasa nyadi pemerintah di nengeri Sarawak laban gaya pemansang lebih progresif ba baruh pegai Kepala Menteri Sarawak, Datuk Patinggi Abang Johari Tun Openg.
“Ngatanka chalun GPS di Simanggang beguna amat laban kitai enggai tinggal arus pemansang ti udah diperambu. Penegap politik maya diatu endang diguna dikena ngelancharka projek pemansang,” ku iya maya Program Pengawa Beripai ke diatur JKKK Cina Brayun Hulu enggau kerejasama Opis Pelilih Sri Aman ba Jalai Litak, Brayun Sri Aman empai lama.
Ku iya madah, kitai patut berati senario politik ke udah nyadi sebedau tu ti ngujungka Menteri Besai Malaysia udah betukar tiga kali.
Nya kebuah, enti politik enda tegap penyarut ulih nyadi lalu penanggul rayat enda dikeibuh ti ngujungka sekeda berebutka kuasa, penuduk enggau pangku pengawa tinggi.
Berebak enggau nya, iya ngelalau rayat terus meri sukung penuh ngagai chalun GPS ngambika ulih menang enggau pekara nya ulih diseliahka ari nyadi di Sarawak.
Rayat mega patut pintar milih chalun ti ulih mai pemansang baka GPS ti nyata mujur bejalaika pengawa ungkup pengelantang rayat.
