SERIAN: Kaban Kunsil Nengeri (ADUN) Bukit Semuja ke lama, John Ilus endang chalun pengari rayat ke engkeman ngetanka kerusi ba sitak iya berindik ari servis pemanah tanggungpengawa ke rayat.
Pemanah iya siru ke rayat nerima puji ari Sapit Kepala Menteri ke mega Parti Pesaka Bumiputera Bersatu (PBB) Datuk Amar Douglas Uggah Embas.
Uggah pechaya John Ilus ulih ngetanka kerusi sitak DUN Bukit Semuja ba Pengawa Bepilih Nengeri Ke-12 (PRN-12) tu ila.
“Iya agi biak, regas enggau kitai chukup puas ati ba pemujur iya, Kitai mega seruran mantu iya ngemansangka sitak Bukit Semuja. Pemujur John udah ngemuaska ati semua orang tambah mega iya agi biak.
“Taja pia, pemutus senentang nya bepanggai ngagai Presiden Parti PBB ke mega Kepala Menteri Datuk Patinggi Tan Sri Abang Johari Tun Openg,” ku iya maya pengerami Program Komuniti Betanam Betupi (AgriCOP) ba balai raya Kampung Remun kena Hari Lima.
Uggah mega ngarap pengundi ba sitak DUN Bukit Semuja meri sukung penuh ngagai pengari rayat ti udah dichalunka Gabungan Parti Sarawak (GPS).
” Aku ngarap orang ditu milih enggau meri undi ngagai GPS ba sitak Bukit Semuja. Tu laban kitai dalam GPS deka terus bejalaika pengawa ke rayat dalam ngemansangka Sarawak nyadi nengeri maju ba taun 2030,”ku iya.
