KAPIT , 24 Nov : Saberkas pampang Bukit Goram mujur ngatur kus teknologi, betanam nguna chara fertigasyen sepengelama dua hari.
Ba hari ti keterubah, kus tu dipejalaika ba Hotel Meligai Kapit ke alai pesereta diajar senentang chara teori ke bekaul enggau teknologi iya nya betanam nguna chara fertigasyen.
Ba hari ti kedua pesereta kus dibai ngabas tegalan alai betanam ti nguna chara fertigasyen di KM2 Jalai Ulu Yong. Sida mega diajar sereta dilatih enggau chara masang sistem ai enggau chara nyembur sum AB.
Enggau nya Saberkas meri besai terima kasih ngagai Dato Sri Alexander Nanta Linggi laban ke udah ngelimpangka diri bejadika program tu sereta ngagai Opis Betanam Betupi Bagi Menua Kapit laban ke udah nyukung program ti diatur Saberkas nya.
Kus tu diajar Chairman Palan Tibang Pemakai Rampangi (TKPM) Kuching, Cooplay Nyipa Aji lalu iya arapka tetiap iku pesereta bulih penemu ke beguna ari kus ke udah diatur nya.
