SELANGAU, 24 Nov: Tetiap iku pesereta ke bisi masuk program tauka kus ti diatur ejensi perintah mesti nguna terus penemu ke diterima nya ngambika enda lenyau.
Siku ari pedagang ba dalam bidang krafjari ke tebilang di Sarawak Datin Melia Gelen madahka, ambika chunto Sarawak Badan Amal Tenaga Isteri-Isteri (SABATI) bisi ngatur kus fertigasyen ungkup Palan Dalam Komuniti (PDK) ke ngaul orang ke timpang pendiau (OKU).
Iya madahka, nengah kus nya pesereta deka diajar enggau nerima penerang senentang chara betanam moden ke lebih mudah seraya meri asil penatai pemisi ke lebih jampat enggau manah.
“Tu seriran enggau chara betanam betupi moden ti dikemeratka perintah Sarawak lalu raban OKU endang diperansang nelebaka diri ba dalam pengawa betanam chara moden.
“Asil tanam nengah sistem fertigasyen tu mega selamat laban enda nguna rachun indu utai,” ku iya madah.
Berebak ari nya, Datin Melia ke mega bini Menteri Muda Undang-Undang enggau Adat Bumiputera Datuk John Sikie Tayai madahka, pengawa dagang enggau servis ukai semina mesti bisi kedai baru ulih dipejalaika, laban rumah pan ulih nyadi endur bedagang.
“Ambika chunto, servis nganta ulih dipejalaika ari rumah enti sema sesiku orang nya bisi set ‘make up’ tauka set nganta.
“Enti sema servis nganta tauka asil keranjai jari kitai nya bekualiti, orang bukai sigi ngiga kitai. Tu mandangka kitai ulih bedagang ba rumah lalu ukai mesti bisi kedai,” ku iya madah agi.
Kelimpah ari nya, iya nerangka senentang pelantar media rama baka Shopee, Facebook, Instagram enggau Whatapp ulih mantu pedagang bedajaka produk enggau servis sida.
“Kitai ke nyadi pedagang mesti ngembuan runding ke kreaktif lebuh ngasilka produk diri empu enggau enda nunda tauka nitihka produk orang bukai seratus peratus.
‘Ambika banding, suba Pua Kumbu digaga nyadika lapik mija enggau dikena ngias dalam rumah. Tang, diatu kitai meda Pua Kumbu diangkat ba dalam industri fesyen,” ku iya madah agi lebuh bejaku ba Program Agriculture Community Outreach Programme (AgriCOP) Bagi Menua Sibu Siri 8 lebuh Hari Satu.
