KUCHING, 24 Nov: Bintulu deka nyadi hab ekonomi menua pemadu besai ungkup nengeri Sarawak.
Menteri Utiliti Dato Sri Dr Stephen Rundi Utom madahka, mayuh industri ditumbuhka di Bintulu baka ari Tanjung Kidurong nyentuk ke Samalaju ti nyendiaka peluang pengawa ngagai rayat di dalam enggau ari luar nengeri.
Dr Rundi ke mega Kaban Kunsil Nengeri (ADUN) Kemena Lama nyemetak madahka, penumbuh bemacham industri di Sarawak mandangka penegap politik ba baruh iring Kepala Menteri Datuk Patinggi Tan Sri Abang Johari Tun Openg.
“Enti kitai beratika gaya Malaysia kemaya hari tu, bisi pekara ke enda menuku nyadi ba renggat perintah besai enggau ba sekeda nengari bukai di Semenanjung.
“Sebedau tu kitai meda gaya di Sabah ke ngatur pengawa bepilih nengeri laban tuai ke belaya enggau enda sama penemu. Pia mega, di nengeri Perak enggau Melaka.
“Kitai beterima kasih ngagai Abang Johari laban udah ngiring perintah Sarawak nguna chara ke pemadu manah,” ku iya madah ba Pengerami Makai Lemai Begulai Enggau Rayat di Bintulu lebuh malam Hari Dua.
Berebak ari nya, iya madahka rayat pupu bansa di Sarawak deka meda pengelantang di nengeri tu, ukai pekara ke meri penyaru tauka enda menuku.
“Enti sema parti politik bisi agenda kediri empu, parti nya enda lama beretan laban kitai endang nemu pekara ti mesti dikemeratka kitai iya nya pengelantang rayat,” ku Dr Rundi madah agi.
