BINTULU, 23 Nov : Dikena nyapai pemansang sereta besenutuk enggau juluk deka nyadika Sarawak nengeri ti mansang manggai taun 2030, perintah nengeri mekuhka pemansang gelumbang ti kedua di bagi menua tu.
Kepala Menteri, Datuk Patinggi Tan Sri Abang Johari Tun Openg madahka, tu berindik ari Bintulu ukai semina nyungkak ekonomi di Sarawak aja tang mega ungkup Malaysia.
“Gelumbang ti kedua ti dipadahka aku iya nya Bintulu patut dikemansang bepelasarka chara ke baru,” ku iya madah.
Iya mansutka jaku nya lebuh bejaku ba pengerami Makai Lemai begulai enggau rayat ba ditu, lebuh malam Hari Dua.
Ke mega ngulu program tu iya nya Menteri Utiliti, Dato Sri Stephen Rundi Utom, Menteri Perintah Menua Enggau Pengawa Berumah Sarawak, Dato Sri Dr Sim Kui Hian enggau Menteri di Opis Kepala Menteri (Integriti enggau Ombudsman), Datuk Talib Zulpilip.
Abang Johari ke mega Chairman Gabungan Parti Sarawak (GPS) madahka, dikena nyapai juluk nya, perintah nengeri ba baruh pegai iya begulai enggau raban iya begunaka sukung rayat. Tu beguna bendar dikena negapka sereta ngemansangka menua.
“Laban semua tu bepanggai ngagai rayat, enti rayat terus meri mandat ngagai aku, aku deka ngemansangka Sarawak seriris enggau pelasar perintah nengeri ke deka nentuka rayat ulih ngasaika pemansang ke lebih manah.” ku iya madah agi.
Ba pengerami nya mega, tuai komuniti enggau tuai raban bansa di serata bagi menua tu mega ngambi peluang begulai enggau Kepala Menteri. – TVS
