BINTULU, 24 Nov: Kepala Menteri, Datuk Patinggi Tan Sri Abang Johari Tun Openg alit ati enggau ulah parti penyakal di nengeri tu ke deka hari bulan Pengawa Bepilih (PRN) Sarawak ke-12 ditangguhka dulu.
Iya ke mega Chairman Gabungan Parti Sarawak (GPS) madahka, PRN Sarawak mesti dipejalaika dikena mulaika mandat tauka kuasa ti sah ngagai rayat awakka milih pengari enggau perintah ti dikedeka sida.
Beduduk ari nya, Abang Johari ngelalau semua rayat Sarawak ngambika terus meri peluang ngagai GPS ngatur menua awakka semua projek pemansang ke udah diperambu ulih terus dikemujurka.
“Mayuh pengawa bedau tembu digaga kami (GPS). Nya kebuah, beri peluang ngagai kami awakka terus ngatur nengeri sereta ngambi pulai kuasa Sarawak,” ku iya madah.
Iya bejaku munyi nya lebuh Pengerami Makai Malam Begulai Enggau Rayat lebuh malam Hari Dua.
Bepelasarka rikod, Kunsil Nengeri (DUN) Sarawak diperambu direrak kena ke 7 Jun ke udah sepengudah cukup timpuh lima taun ari hari bulan keterubah aum DUN nya diatur.
Taja pia, pengawa ngererak tu ditangguh ketegal proklamasyen darurat di Sarawak ti ditukuka Yang di-Pertuan Agong Al Sultan Abdullah Ri’ayatuddin Al Mustafa Billah Shah berengkah ari 2 Ogos 2021 nyentuk ke 2 Februari 2022 ketegal pandemik COVID-19.
Nangkanka nya, Agong setuju ngetuka proklamasyen darurat tu kena ke 3 November ti ngujungka DUN Sarawak direrak ti meriawak PRN Sarawak ke-12 ulih diatur. -TVS
