KUCHING, 21 Nov: Pemutus Pengawa Bepilih Nengeri (PRN) Melaka lebuh hari enam mandangka rayat di nengeri nya deka politik enggau perintah ti tegap ke ulih dipeda mai pemansang.
Chairman Gabungan Parti Sarawak (GPS) Datuk Patinggi Tan Sri Abang Johari Tun Openg madahka, pemutus di nengeri Melaka kemari mandangka rayat nulak budaya politik ‘engkatak’ ke ngembuan penteba engkechit tauka merejuk enda terenah.
“Pemutus ke dibantaika kemari bisi mai dua reti iya nya rayat deka perintah ke tegap.
“Pemutus PRN di nengeri Melaka tu patut dijadika teladan kitai.
“Reti ti kedua iya nya rayat nulak budaya politik engkatak. Rayat udah kelalu bansu enggau gaya politik ke enda terenah,” ku iya ke mega Presiden Parti Pesaka Bumiputera Bersatu (PBB) madah.
Iya madahka, nengah pemutus nya bisi parti endang ditemu teguh nerima kusung undi, lalu deka nguji masuk ke Sarawak.
Abang Johari ke mega Kepala Menteri Sarawak mansutka jaku nya rambau Pengerami Nasih Tanah Jematan Sungai Sarawak, Sejingkat sehari tu.
Pemutus PRN nengeri Melaka ari Komiti Pengawa Bepilih Besai (SPR) mantaika Barisan Nasional (BN) menang 21 ari 28 kerusi Kunsil Nengeri (DUN) Melaka lebuh Hari Enam.
