KUCHING, 20 Nov: Rayat ke mendam di menua peisir tebal agi di rumah panjai mesti diberi penerang senentang baka ni chara minta bantu ke disediaka perintah baka bantu Program Nyeruri Rumah Panjai.
Pia mega bisi sekeda peranak di rumah panjai bedau nemu bantu ke udah disediaka ungkup sida laban nadai dipadahka tauka diterangka senentang bantu ke ulih dipinta.
Menteri di Opis Menteri Besai (Parlimen enggau Undang-Undang) Dato Sri Wan Junaidi Tuanku Jaafar madahka, sekeda ari bantu tauka program ke diberi perintah mesti dipinta nengah chara digital, lalu sekeda rayat di menua pesisir kurang pengelandik nguna teknologi kemaya hari.
“Nyadi, pengari rayat kitai, pegawai pelilih, opis pelilih menua anang semina duduk ba opis aja. Sida mesti ngelawa rayat, meri licha ngagai tuai peranak enggau rayat.
“Sida ke nyadi tuai peranak mega ukai semina bejaku senentang masjid, gerija, kuil aja. Sida mesti nerangka ngagai rayat ke dijaga sida bekaul bantu enggau program ke udah disediaka perintah,” ku iya madah.
Ku iya madah, kerejasama ari semua renggat tu endang beguna dikena nentuka duit turu enggau bantu ke udah disediaka nya datai ba rayat.
Wan Junaidi ke mega Kaban Parlimen Santubong nyemetak madahka, tetiap iku tuai peranak sekalika tuai genturung pendiau, tuai rumah, kapitan, pengulu enggau pemancha mesti nemu tanggungpengawa ke patut dipejalaika sida.
Naka ke diatu, mayuh udah rumah panjai di sarawak udah nerima bantu ke udah disediaka perintah dikena nyeruri tauka ngemanahka tikas rumah panjai sida.
“Tang, enti sema program tu dikemesaika agi di serata Sarawak kemaya hari lebih mayuh agi rumah panjai ulih ngasaika pengelantang ari bantu ke disediaka perintah. Perintah nadai napi penanggul laban agih belanja udah diungkupka. Duit ke diberi nya mesti diguna enggau manah,” ku iya madah agi.
Iya mansutka jaku nya lebuh dirandau ba dalam program Sarawak Decides TVS sehari tu.
