KUCHING, 20 Nov: Perintah Sarawak ba baruh iring Kepala Menteri Datuk Patinggi Tan Sri Abang Johari Tun Openg nyendiaka genturung pendiau tauka kandang endur berumah ke chukup lebih agi di mengeri.
Tuju ti dikena ngurangka penanggul setinggan ke sudah ditemu ba kandang endur mengeri seraya nyendiaka rumah ke nyamai endur diau, likun sereta ulih dibeli tauka diempu.
Kelimpah ari nya, perintah mega bejalaika Projek Nyeruri Rumah Seranta Sarawak (PPRMS) ti nguna ungkus RM80 juta enggau enggau Program Nyeruri Rumah Panjai ti nguna ungkus RM50 juta.
Iya mansutka jaku nya lebuh dirandau ba dalam program Sarawak Decides TVS sehari tu.
Ku Menteri di Opis Menteri Besai (Parlimen enggau Undang-Undang) Dato Sri Wan Junaidi Tuanku Jaafar madahka, taja pia ngemansangka genturung pendiau tu ukai semina di mengeri aja tang mega mungkur di menua pesisir.
“45 peratus rayat di Sarawak agi mendam di menua pesisir ti ngujungka pengawa tu mesti diteruska nyentuk ke 20 taun ti deka datai.
“Program ke dipejalaika perintah nengah bemacham koridor ke udah ditumbuhka baka di Serian, Kapit, Mukah, Limbang, Lawas ti udah diungkupka duit turu dikena bejalaika sekeda projek ke udah diperambu,” ku iya madah.
Ku iya ke mega Kaban Parlimen Santubong madah, pekara tu mandangka perintah enda bechiping ngemansangka program tauka projek rumah di mengeri enggau menua pesisir.
“Aku ke mega kala di Batang Lupar, semak 20 peratus peranak Iban ke diau ba rumah panjai. Kitai endang nemu pengawa ngemanahka tikas rumah panjai jarang nerima perati sebedau tu.
“Tu nyengkaum pemansang infrastrakcha baka jalai, bekal ai, bekal karan enggau ke bukai.
“Tang, perintah Sarawak diatu mekuhka pemansang nya dikemesaika di kandang menua pesisir ti nguna agih belanja ke besai ngambika sida enda tinggal ari ngasaika perengkaguna tu,” ku iya madah agi.
