JULAU, 20 Nov: Kepala Menteri Datuk Patinggi Tan Sri Abang Johari Tun Openg madahka dalam timpuh lima taun ti deka datai iya deka numbuhka ‘Sarawak Sovereign Fund’ tauka Duit Turu Besai Perintah Sarawak ungkup pemansang nengeri.
Pemisi duit turu tu ila deka meri pemaik enggau penguntung ungkup tetiap iku rayat Sarawak tebal agi ungkup nembiak rebak baru lalu diatu perintah Sarawak ngatur belanja enggau ekonomi nengeri nguna chara ke pemadu manah.
“Ba dalam pekara tu kitai mesti bekerejasama. Perintah besai ngaga Jalai Besai Pan Borneo, perintah Sarawak ngagai jalai tebing tasik. Jalai tebing tasik disambung enggau Jalai Pan Borneo.
“ Tu ngujungka tanah dibuka sereta ngerembaika ekonomi. Tu meri penguntung ngagai rayat. Rayat mega ulih ngiga chara dikena nambahka asil penatai pemisi,” ku iya madah.
Ku iya madah, perintah Sarawak sebedau tu mega nyendiaka duit turu dikena mantu rayat ke tebunsa ketegal pengekai igi penyakit COVID-19 nengah Bantu Khas Sarawakku Sayang tauka (BKSS).
Abang johari nerangka senentang polisi ekonomi ke udah diperambu enggau dipejalaika perintah, pemansang di nengeri tu deka mungkur semua endur ti nadai siku tinggal ari ngasaika pengelantang ke dibai perintah.
“Kita ulih meda rikod aku sepengudah empat taun ti deka datai. Enti deka meda aku ngamatka jaku tauka enda kita ulih meda rikod aku sebedau tu.
“Di kandang menua pesisir jalai, bekal ai, bekal karan udah dipejalaika lalu kitai deka ngemesaika agi pemansang infrastrakcha tu. Berindik ari nya, aku minta mandat baru ari rayat diberi baru ngagai aku enggau kami ke bukai ungkup kita semua,” ku Abang Johari madah agi.
Iya nyemetak madahka perintah Gabungan Parti Sarawak (GPS) enda ngira kompenan parti endang seruran begempung ngemansangka nengeri enda ngira bansa, asal tauka batang pengarap.
Iya mansutka jaku nya rambau pengerami bejadika Jalai Besai Pan Borneo Sarawak Work Package Contract 07 (Seksyen Julau) lebuh Hari Enam.
