KUCHING, 20 NOVEMBER : Dato Sri Alexander Nanta Linggi sigi gaga ati enti sema premis Tealive ulih dibuka di Kapit, baka ba mengeri bukai di serata Sarawak.
Berindik ari nya, Nanta ke mega Kaban Parlimen (MP) Kapit udah ngaga peminta ngagai Loob Holding Sdn. Bhd. enggau Tuai Pegawai Eksekutif (CEO) Bryan Loo kena 19 November 2021 ngambika numbuhka sebuah premis nya di Kapit.
Entudika nya, iya ngingat maya iya ngelancharka premis Tealive sepengudah nyadi Menteri Dagang dalam Menua, enggau Pekara Bebelika Barang ba 2020, iya berasai rindu ati tebal agi anak indu iya sereta nembiak rebak baru rindu ngirup ai Tealive.
Iya andal ati Tealive ulih nyapai pemujur ba luar mengeri Kuching lalu pemujur nya ulih meri inspirasyen ngagai raban nembiak ngambika nyungkak ekonomi menua.
Iya mega ngelalau mensia mayuh kelebih agi raban pedagang nerima gaya idup ke bari sereta nyadi inovatif lebuh pandemik COVID-19.
“Tealive tu sigi chukup manah enggau tim iya nyengkaum mayuh bala nembiak ti dituaika CEO iya empu, Bryan Loo. Nangkan ke nya, Tealive tu mega inovatif laban udah mantaika chara baru iya nya ‘home kits’ ti dikena maya Atur Tagang Pemindah (PKP) dipejalaika ba taun siti nyin tadi,”
“Tealive udah menang mayuh anugerah ba tikas nasional sereta menua luar, entara kategori iya nya ‘E-commerce’, ‘human resources’ enggau pengawa bedagang nengah tali arus,”
Iya madah munyi nya sepengudah ngelancharka premis Tea Live ‘Drive Thru’ keterubah di Sarawak, ba The Northbank kemari.
Naka ke diatu, Sarawak udah bisi 12 premis Tealive.
