KUCHING, 19 Nov: Tetiap iku nembiak endang ngembuan pengerindu ke bebida lebih agi ngaul sesebengkah bidang.
Sekalika bidang nya semina dikereja maya lepa tauka nyadi karier tauka batang pengawa.
Siku nembiak ke benama Georgina Steel ngembuan pengerindu ba pengawa betanda ti ngujungka iya diatu gawa nyadi artis budaya di Opis Budaya enggau Seni Menua (JKKN) Nengeri Sarawak.
Iya chukup temegah ati laban nyadi siku artis budaya ke ngemeranka seni tanda Sarawak ba renggat dunya sereta nengah peluang nya iya ulih ngasaika mayuh macham peneleba ke chukup beguna dalam pengidup.
Taja pia, iya madahka sesiku penari profesional mesti nyikap diri napi pemar enggau penguji lebih agi ari sukut runding enggau fizikal.
“Hari keterubah aku gawa nyadi artis budaya meri peneleba ke chukup manah. Maya nya kami suah belatih tetiap ujung minggu dalam timpuh sebulan.
“Aku diberi pengawa belatih mai empat bansa tanda. Beduduk ari nya, aku bebendar ngingatka bungai tanda ba timpuh ke enda lama,” ku iya madah.
Nangkan ke nya, iya madahka diri agi mayuh pengurang lalu iya bekenanas belajar enggau betanya ngagai jurulatih enggau kaban bukai ke udah lama sereta landik ba dalam bidang nya.
Berindik ari pengeransing nya tadi, Georgina mujur ngingatka keempat-empat bungai tanda ke diasuh orang dipelajarka iya.
“Nya mih entara pemar ke mesti ditempuh ba dalam pengidup aku ke gawa nyadi penari ti ngajar kitai bebendar gawa ungkup pemujur dudi hari enggau anang mudah putus pengarap tauka leju,” ku Georgina madah agi.
Kelimpah ari nya, sepemanjai karier iya ke nyadi artis budaya di JKKN, Georgina diberi peluang bejalai ke menua luar seraya mandangka tanda menua tu baka di Hong Kong, Singapura, Korea Selatan, Rome enggau Paris.
Iya mansutka jaku nya lebuh dirandau ba dalam program Femina TVS apin lama ke udah.
