KUCHING, 19 Nov: Perintah Sarawak nengah Opis Menteri Nembiak enggau Lumba (KBS) merambu deka numbuhka palan penyulut lumba, lalu pemisi palan nya dikena nyendiaka palan latih ti sebaka enggau Kompleks Lumba Menua di Bukit Jalil.
Tu siti ari perambu timpuh panjai ngambika atlit sarawak besemekih ba renggat ke lebih tinggi.
Nangkan ke nya, Direktor Opis Nembiak enggau Lumba Nengeri Sarawak, Lamat Nyalau madahka, ba baruh KBS nya endang perambu ke chukup manah dikena ngemansangka bidang lumba di Sarawak.
“Ba baruh program tu ila kitai deka numbuhka sekeda akademi ke alai akademi nya deka dibagi kitai ngagai seksyen.
“Ambika chunto, kitai deka numbuhka palan penyulut tauka palan pemungkal, palan elit enggau palan elit senior ti disengkaumka kitai sekali dikena kitai nempa atlit Sarawak ke ulih besemekih di renggat nengeri, menua sereta entarabansa,”ku iya madah.
Kelimpah ari nya, lamat nerangka senentang opis menteri mega mekuhka pengawa negapka bidang nyadi jurulatih lumba ngambika juluk Sarawak deka nempa atlit ke ulih besemekih ba tikas dunya ulih dijapai.
“Kitai mesti bisi jurulatih ke bekualiti enggau betikas dunya. Tu entara pekara ke chukup beguna ungkup nengeri Sarawak kemaya hari.
“Kelimpah ari nya, enti sema hab lumba nya ditumbuhka ila kitai mesti ngambi peluang nguna sains lumba baka ke udah dikena menua maju ke bukai,” ku iya madah agi.
Iya mansutka jaku nya lebuh dirandau ba dalam program Sarawak Decides TVS sehari tu senentang pengawa negapka bidang lumba di nengeri Sarawak.
